በአማራ ክልልና በአዲስ አበባ በባለስልጣናቱ ላይ ለደረሰው ግድያ አዴፓ ራሱን ተጠያቂ እንዲያደርግ ህወሃት ጠየቀ

የህዝባዊ ወያነ ሃርነት ትግራይ( የህወሐት) ማዕከላዊ ኮሚቴ በመቀሌ ለሁለት ቀናት ሲካሄድ የነበረው አስቸኳይ ስብሰባ ትላንት ተጠናቋል።

ህወሐት በመግለጫው በአሁኑ ጊዜ ሀገሪቷን ሊበታትን ያለው ከዚህም ከዚያም የተሰባሰበ የትምክህተኞች ቡድን ነው፤ ይህ ኃይል እንደፈለገ እንዲንቀሳቀስ እድል የሰጠው ደግሞ የአማራ ዴሞክራሲያዊ ፓርቲ (አዴፓ) ስለሆነ አዴፓ በአጠቃላይ ስለ ጥፋቱ፤ በፓርቲው አመራር ላይ የተፈፀመውን ግድያ በዝርዝር ገምግሞ ራሱን ተጠያቂ እንዲያደርግና የኢትዮጵያን ህዝብ ይቅርታ ሊጠይቅ ይገባል ብሏል።

ሲቀጥልም በጄኔራሎቹና በአመራሮቹ ላይ የተፈፀመው ግድያ በሃሳብና በተግባር በቀጥታና በተዘዋዋሪ እጅጃቸው ያለበት የውስጥና የውጭ ኃይሎች ገለልተኛ በሆነ አካል በአስቸኳይ ሊመረመር ይገባል፤ ውጤቱም ለህዝብ በየጊዜው በግልፅ መነገር አለበት ሲል ያሳስቧል።

የተቋሞች ሃላፊዎችና የፀጥታ ተቋማት መሪዎች ተገቢውን ኃላፊነታቸው ባለመፈፀማቸው ለተፈጠረው ጥፋት ተጠያቂ መሆን አለባቸው ብሏልም በመግለጫው።


ውስጣዊ ችግሮቹን ከመገምገም ይልቅ በነገሩ የሶስተኛ አካል እጅ አለበት በማለት ጥፋቱን ለመሸፋፈን መሞከርና ህዝቡን ማደናገር ማቆም አለበት ሲልም ህወሐት አዴፓን አሳስቧል፡፡


ህወሐት ያወጣው መግለጫ አዴፓ ውስጣዊ ችግሮቹን ፈትሾ አቋሙን እንዲያሳውቅም ጠይቋል፡፡

ይህንን ማድረግ ካልተቻለ ግን ህወሃት ከፓርቲው ጋር ለመስራትና ለመታገል እንደሚቸገርም ገልጿል፡፡


እስካሁን ያጋጠሙ መሰረታዊ ችግሮች በኢህአዴግ ውስጥ የተፈጠረው የአሰላለፍ መደበላለቅና ኢህአዴግ ሁሉንም አይነት ጥገኛ አመለካከቶች ተሸክሞ የሚኖር ድርጅት እየሆነ ስለመጣ ነው። ቀድሞ ወደሚታወቅበት ባህል ተመልሶ በህግና በደንቡ መመራት እንደሚገባውም ድርጅቱ አሳስቧል።


ኢህአዴግ እንደ ግንባር ሆነ እንደ መንግስት በቀጣዩ ዓመት መደረግ ስላለበት ሀገራዊ ምርጫ ያለውን ቁርጥ ያለ አቋም እንዲያሳውቅም በመግለጫው ጠይቋል።


በደቡብ ብሄር ብሄረሰቦችና ህዝቦች ክልል እየተነሱ ያሉት ክልል የመሆን ጥያቄዎች ህገ-መንግስታዊ በሆነ መንገድ ሊፈቱ እንደሚገባ ከዚህ ዉጪ የህዝብ ጥያቄ በሀይል ወይም በሌላ መንገድ ለመፍታት የሚደረግ ጥረት ፍፁም ተቀባይነት እንደሌለው አሳውቋል።

Leave a Reply

Your email address will not be published. Required fields are marked *